الكهربا هتبقى بالإيطالي.. مصر معروض عليها محطة رياح بـ 200 مليون يورو

- شركة إيطالية بتعرض على مصر، تعمل محطة طاقة رياح قيمتها بتوصل لـ 200 مليون يورو، وبعد كده تبيع الكهربا اللي هتنتجها من المحطة للشركة المصرية لنقل الكهرباء، بعد ما يتفقوا على تعريفة معينة.

- المفروض الشركة هتقدم عرض كامل خلال الأيام الجاية، وزي ما هو معلن فيه مناقشات تمت بين الشركة والحكومة خلال الشهرين اللي فاتوا.

- عرض الشركة الإيطالية، هيكون من ضمنه تدبير التمويل الخاص بالمحطة وده عن طريق البنوك الإيطالية والبنك الأوروبي لإعادة الإعمار والتنمية.

- كمان عرض الشركة، فيه تعهد أنها تقدم خطاب ضمان بنكى غير مشروط، ويكون  صادر من أحد بنوك الدرجة الأولى المحلية، وقيمته تقريبًا 0.5 % من قيمة المشروع.

- الشركة عايزة الأرض اللي كانت مخصصة قبل كده لشركة إيطالجن الإيطالية، وكان المفروض هيتعمل عليها محطة طاقة رياح بقدرة 120 ميجاوات.. وممكن أي قطعة من الأراضي المناسبة لإقامة المشروع في جبل الزيت، وخليج السويس.

- في كلام أن الحكومة بتحاول تقنع الشركة الإيطالية للاستثمار أو الاستحواذ على جزء من مجمع محطات طاقة رياح الزعفرانة أو مجمع رياح جبل الزيت، واللي تم طرحها فى البورصة.

- ولو ما تعرفش نسبة القدرات الكهربائية المنتجة من الطاقة المتجددة على الشبكة القومية هي 20%، بس وزارة الكهرباء بتسعى لزيادتها لأكثر  من 43% في عام 2035، عبر  مشروعات القطاع الخاص.