لو هتشتري عجل استنى.. دلع عربيتك بإطارات صناعة مصرية من أول ابريل

لو هتشتري عجل استنى.. دلع عربيتك بإطارات صناعة مصرية من أول ابريل 

ارتفاع أسعار إطارات المركبات عملك فجوة، اطمن ومتقلقش قريبا هيتم طرح إطارات مصرية صناعة محلية في الأسواق.

مصر اللي كانت بتستورد إطارات بـ 2 مليار دولار سنوياً ، لحوالى 10 ملايين سيارة، هتغير معادلتها اول إبريل المقبل وكمان هتصدر لـ 11 دولة عربية وأفريقية وأوروبية، وهيكون نسبة الاكتفاء الذاتي حوالي 90%.

تصنيع الإطارات هيكون متعدد وبجميع الأنواع، لكل المركبات "تروسيكل، موتوسيكل، توكتوك" وده هيكون بطاقة إنتاجية تصل إلي 10 الاف إطار يوميا وفي نهاية 2023، هيتم طرح إطارات للسيارات الملاكي والتاكسي، وكمان بتخفيض للأسعار تبدأ من 370 جنيها حتى 2290 جنيهًا.

المرحلة الأولي من المشروع، هيتصنع خلالها 57 مقاسًا من الإطارات المتنوعة ، وهيتم التصدير إلى 10 دول وهترتفع الطاقة الإنتاجية لتصبح 30 ألف إطار يوميا بدلا من 10 آلاف، من ابريل وحتي يونيو 2023.

كمان هيتم إنتاج 5 خطوط، وهي إطارات خارجية للدراجات النارية والجرارات الزراعية ومقاس 1 للسيارات الملاكي سوزوكي بالإضافة إلى خط إنتاج «البلون الداخلي» والتي يبدأ من العجلة الهوائية وينتهي بالسيارات النقل واللودر وينتج 18 ألف قطعة يوميا بإجمالي حوالي 550 ألف بلون داخلى شهريا.


المصنع هيصدر لبعض دول أفريقيا منها " موزمبيق وغانا ونيجريا" والمغرب وتونس والجزائر وكينيا والسودان وسوريا وتركيا واليمن وباكستان والعراق ، وباقي الإنتاج سيخصص للسوق المحلية.


وبما إن صناعة الإطارات صعبة، وبتتعلق بحياة المواطنين هيتم عمل اختبارات داخل المعامل للمواد الخام قبل استخدامها حفاظا علي البيئة.. من هنا ورايح متفكرش إزاي هتغير إطارات مركبتك اللي اتهلكت، وعامل جمعية عشان تشتري مستورد، انسي الكلام ده وشجع صناعة بلدك .