مشاكل البطارية تعطل أحلام فورد مع الشاحنة الكهربائية

الشركة الأميركية فورد، قررت متسلمش الشاحنة الكهربائية "إف 150 لايتنينغ" للتجار، بسبب مشكلة في البطارية، مش عارفين سببها لحد دلوقت.

الغريب أن الشركة قررت وقف عمليات البيع وإنتاج الشاحنة الكهربائية الأكثر مبيعا في أمريكا، بس حسب فورد ده هيكون بشكل مؤقت.

فورد أعلنت أنها مش هتنتج الشاحنة في مصنعها بمدينة "ديربورن" بولاية ميتشيجان، حتى وصول المهندسين لحل مشكلة الجودة اللي اكتشفوها في البطارية.

فورد بدأت في بيع الشاحنة اللي ارتفع الطلب عليها في أمريكا خلال أبريل الماضي ٢٠٢٢.

الشاحنة كانت أكثر من ضعف مبيعات السيارات الكهربائية في فورد، خلال العام الماضي، وبسببها احتلت الشركة المركز الثاني في مبيعات المركبات الكهربائية في أميركا بعد شركة "تسلا".

فورد كانت مشغلة ٣ ورديات طول الأسبوع، لزيادة الإنتاج إلى 150 ألف شاحنة سنويا.

وبعد الإعلان عن توقف إنتاج الشاحنة، انخفضت أسهم "فورد" بنسبة 1.3% .