ثروات مصر تجذب الجميع.. الدنمارك عايزة تستثمر في الهيدروجين الأخضر

بص ياسيدي الدنمارك شكلها بتدور على الاستثمار في مصر، فقعدت مع وزير الكهرباء الدكتور محمد شاكر، عشان تشوف أيه أفضل الفرص الموجودة في الدولة، وطبعا احنا في زمن الطاقة المتجددة.

الدكتور محمد شاكر، أغرى وفد شركة (CIT) الدنماركية، بالاستثمار في قطاع الكهرباء والطاقة المتجددة، بعد ما عرفهم على تجربة مصر والإنجازت اللي حققها قطاع الكهرباء فى مجال خفض الانبعاثات.

الخبرة ليها ناسها برضه، زي ما عمل وزير الكهرباء مع الوفد الدنماركي، وأقنعهم بأن الاستثمار في مصر مكسب ليهم، لما تملكه من ثروات طبيعية متنوعة وغنية في مصادر الطاقات المتجددة وخاصة طاقة الرياح والشمس، اللي بتؤهل الدولة تكون أحد أكبر منتجي الطاقة المتجددة.

في نفس الوقت وزير الكهرباء كان بيعرض الاستفادة اللي هتعود للشركة من الاستثمار في مصر، وهو واقف على أرض صلبة، وقالهم أن في تعاون مع شركات عالمية ومحلية، لإنتاج الهيدروجين الأخضر، وكمان تم  توقيع 23 مذكرة تفاهم منها 9 اتفاقيات مع كبري الشركات خلال مؤتمر المناخ cop 27.

مصر برضه عايزة تستفيد من ثرواتها الطبيعية وتحديدًا مصادر الطاقة الجديدة والمتجددة، لتنويع مصادر إنتاج الطاقة الكهربائية، لتصل مساهمتها في مزيج الطاقة في الدولة إلى 42% بحلول عام 2035.

فيليب كريستيان شريك مؤسس شركة (CIT) الدنماركية، بعد ما خلص الوزير كلامه، وشاف حرص على التعاون مع جميع دول العالم والاستفادة من خبراتهم، كشف عن رغبته فى التعاون فى مجال الطاقات المتجددة والهيدروجين الأخضر.

كما شاف أن في فرص واعدة للاستثمار فى المجال، وأكبر دليل اهتمام الجهات العالمية للاستثمار في مصر، خاصة وأنها بوابة للدخول إلى قارة أفريقيا.