اغلب وحش الإستهلاك.. 6 طرق لتوفير الكهربا تجربهم مع الديب فريزر

لكل الناس اللي عندها ديب فريزر بس لما الأسعار ولعت، مبقاش فيه فراخ تتخزن، ولا لحمة عشان الضيوف، بس هتلاقيك مشغله برضه على شوية الأكل اللي سايبهم للزمن، أو عامل حسابك عشان رمضان، بس خلي بالك ده عبارة عن وحش بيستهلك كهربا.

وزارة الكهرباء حذرت كل اللي عندهم ديب فريزر، بسبب أنه وحش استهلاك بيرفع فاتورة الكهرباء كل شهر، ونصحت اللي عندهم ديب فريزر، بـ 6 طرق لترشيد استهلاك الكهربا، وهي:

1-  ظبط درجة حرارة الديب فريزر عند (-18) عشان كل ما درجة الحرارة منخفضة بيقلل من الاستهلاك.

2- بطل تفتح الباب كتير، دي مش تلاجة، لما بتفتح فتح الباب كتير ده بيقلل استهلاك الطاقة، ويخلي الفريزر يستهلك كهرباء أكثر عند التبريد النشط، اللي هو فترة عمل الماتور.

3- أبعد الديب فريزر، عن البوتاجاز والميكروويف وأي مصدر حرارة، عشان المنطقة المحيطة بالفريزر بتأثر على استهلاك الطاقة وفترة تشغيله

4- خلي مسافة حول الديب فريزر من جميع الاتجاهات، عشان يكون في هوا كافي  حول الفريزر، يعني من كل جانب سيب مسافة 10 سم على الأقل، والأهم من ظهر الفريزر.

5- تأكد من دليل المستخدم الخاص بالفريزر الخاص بك لمعرفة المسافات الموصي بها.

6- أوعى تخزن الأكل وهو سخن في الديب فريزر، سيبه يبرد الأول وبعدين خزنه.