الراجل اللي كل شوية يقطع الكهربا.. حاسب هتوقع الإقتصاد

بيقولك أن فكرة الكهربا تقطع كل شوية ده، خطر كبير على الاقتصاد، وبتعمل انكماش حاد زي ما حصل في جنوب أفريقيا، اللي انكمش جدًا  في الربع الأخير من سنة 2022.
اللي حصل في اقتصاد جنوب أفريقيا، كان بسبب قطع الكهربا بشكل مستمر من جانب شركة الكهرباء المملوكة للدولة، وده طبعًا بيقلل الإنتاج، ومش بيخليه يمشي بصورة طبيعية.

هيئة الإحصاء في جنوب أفريقيا، قالت في تقرير، إن الناتج المحلي للبلاد انكمش 1.3% خلال الربع الأخير من 2022، مقارنة بالنمو المعدل بالزيادة عند 1.8% في الربع الثالث من العام الماضي.

شركة الكهرباء في جنوب أفريقيا اللي اسمها "إسكوم هولدينغز"، كانت بتقطع الكهربا بشكل كبير، في جميع الأيام باستثناء ثلاثة أيام خلال الربع الأخير من السنة، وده اللي بيسموه تخفيف الأحمال.

والشركة زي ما بتقول كانت بتقطع الكهربا، كل يوم منذ بداية سنة 2023، عشان تحمي الشبكة من الانهيار.

في تقرير لـ "بلومبرج"، بيقول أن أزمة الكهرباء في جنوب أفريقيا، بتكلف البلد بتاع 49 مليون دولار، كل يوم، وهتقلل نمو الإنتاج بمقدار نقطتين مئويتين في 2023، زي  ما تقديرات بنك الاحتياطي في جنوب أفريقيا بتتوقع.

الصدمة الأكبر أن انقطاع الكهربا هيفضل كده لمدة سنتين كمان، عشان شركة "إسكوم" لسه بتصلح محطاتها لتوليد الكهرباء... وعشان توقف انقطاع الكهربا، هيحتاجوا ما بين 4000 إلى 6000 ميجاوات إضافية.

في مصر في خطة لقطع الكهرباء بشكل منتظم، لتوفير الطاقة وكذلك توفير كميات للتصدير.. فهل يتأثر الاقتصاد المصري.