"هانت وهنكهرب الطريق".. إنتاج أتوبيس كهربائي "نصه مصري"

الجميل في مصر أنها بدأت تفكر في الإنتاج، وده اللي بتعمله الدولة بتوطين صناعات النقل في مصر، ومنها صناعة الاتوبيسات الكهربائية الصديقة للبيئة.

الهيئة العربية للتصنيع، اللي ناوية تنتج الأتوبيس الكهربائي، في مشروع ثلاثي، هيكون معاها فيه "الجيوشى موتورز" وأحد الكيانات الصينية، واللي بيتسعدوا لإنتاج الأتوبيس خلال فترة صغيرة.

اللواء مختار عبد اللطيف، رئيس الهيئة العربية للتصنيع، قال إن اختبارات الأتوبيس الكهربائي، اللي بيتم إنتاجه بالتعاون مع شركة "الجيوشى موتورز" وكيان من الصين، بدأت فعلا، وكانت مبشرة.

الاختبارات اللي بتقوم بيها الهيئة مع "الجيوشي موتورز" عشان تتطمن على الأتوبيس الكهربائي، وتاخد خطوة نحو الإنتاج، بيقطع 20 ألف كيلو في شوارع القاهرة.

مشروع الأتوبيس الكهربائي، هدفه السير في توجيهات القيادة نحو الإنتاج المحلي، عشان يكون نسبة التصنيع المحلي للأتوبيس في البداية من 50% لـ 60% ، لحد ما نوصل إلى نسبة تصنيع كامل 100 %.

الأتوبيس صديق البيئة، كان من أهداف نتائج قمة المناخ COP27، اللي انعقدت في شرم الشيخ، عشان يساعد في الحفاظ على المناخ، باستخدام وسائل النقل الجماعي الأخضر، من أجل الأجيال القادمة.

كمان الأتوبيس الكهربائي، اللي يعتبر نصه مصري، هيكون إضافة حضارية تسهل حركة المواطن بشكل سريع وآمن.