من وزارة الكهربا لوزارة البترول: "شوية ومش هناخد منكم وقود تاني"

الطاقة المتجددة خلاص مبقتش رفاهية، الطاقة المتجددة كنز بيخليك تستغنى عن التلوث ويوفر معاك الفلوس، وده اللي بتعمله وعملته وزارة الكهرباء، لما انخفض نسبة استخدامهم للوقود 20% عن السنين اللي فاتت.

وزارة الكهرباء والطاقة المتجددة، قالت على لسان أحد ممثليها، أن الوقود المستخدم لإنتاج الكهرباء انخفض بنسبة 20% عن السنين اللي فاتت.

نسبة الخفض دي، سببها خطة شركة القابضة لكهرباء مصر، اللي شغالة عليها من سنة 2014 وحتى الآن، وهي التوسع فى الاعتماد على الطاقة المتجددة.

وزارة الكهرباء شايفة أن خفض نسبة الاعتماد على الوقود فى توليد الطاقة، ده أهم حاجة لازم تعملها.

كمان محطات سيمنس العملاقة الثلاثة الموجودة في بنى سويف والبرلس والعاصمة الإدارية الجديدة، كان ليها دور كبير في توفير الوقود، عشان بتعتمد على أحدث المواصفات العالمية، اللي بتدي أعلى كفاءة فى إنتاج الكهرباء وأقل استهلاك الوقود.

مثلا محطات سيمنس، بتعتمد على أحدث تكنولوجيا عالمية، تصل إلى أكثر من 60% لخفض استهلاك الوقود وتقليل الانبعاثات.

وزارة الكهربا، وصلت بالاعتماد على الطاقة المتجددة من الحمل الأقصى لحد ما وصل  20%، حيث تصل القدرات إلى حوالى 6378 ميجاوات، وتبلغ القدرات الحالية حوالى 5878 ميجاوات.