"مصر بتنور جيرانها".. وموصلة الفيشة لحد جنوب السودان

الاحتراف الخارجي، ونقل الخبرات للأشقاء والجيران في كل مكان.. ده اللي بتعمله وزارة الكهرباء مع دولة جنوب السودان، بإعادة تأهيل محطات كهرباء مدينتي يامبيو ورومبيك وتوصيل التيار إلى أقصى نقطة.

المهندس سامي عرفة أبو وردة، رئيس مجلس الإدارة والعضو المنتدب لشركة القناة لتوزيع الكهرباء، زار جنوب السودان، عشان يتابع الأعمال اللي شغالة لإعادة تأهيل محطات كهرباء وشبكات الجهد المتوسط و المنخفض، في مدينتي رومبيك و يامبيو، وتوصيل التيار الكهربائي الي أقصى نقطة فيهما. 

في اتفاقية وقعها المهندس جابر دسوقي، رئيس مجلس إدارة الشركة القابضة لكهرباء مصر، مع حكومة جنوب السودان لإعادة تأهيل محطات كهرباء مدينتي يامبيو ورومبيك بجنوب السودان.

الاتفاقية دي جت بعد توجيهات من الرئيس عبد الفتاح السيسي، اللي طالب بتقديم كل الدعم للأشقاء في جنوب السودان، وبتعليمات من الدكتور محمد شاكر وزير الكهرباء والطاقة المتجددة، بسرعة التنفيذ.

رئيس الشركة زار محطة كهرباء ولاية رومبيك، و تم تشغيل المحطة والتحميل على الشبكة، وكمان تم تحميل وإنارة الولاية بالكامل، وسط فرحة وسعادة الأهالي في جنوب السودان.

والي مدينة رومبيك، ووزير الكهرباء في الولاية، قدم الشكر والتقدير للرئيس عبد الفتاح السيسي، بسب دور مصر في دعم جنوب السودان، وكمان شكر وزارة الكهرباء والطاقة المتجددة والشركة القابضة لكهرباء مصر لدورها في تشغيل محطة رومبيك، وتوصيل الكهرباء للمدينة طبقا للمعايير العالمية وفي زمن قياسي.

المهندس سامي عرفة أبو وردة، شكر ممثلي الولاية، على دعمهم وتعاونهم مع فريق عمل شركة القناة، وقدم التحية لكل فريق العمل من شركة القناة لتوزيع الكهرباء، علي المجهود الرائع والعمل المتميز.