مش بس اكتفاء ذاتي.. دا الغاز عندنا كتير والتصدير بيزيد

مصر مش بس عاملة اكتفاء ذاتي من الغاز، ده التصدير كمان كل سنة بيزيد.. وده اللي وضحه المهندس ياسر صلاح الدين، رئيس الشركة المصرية للغازات الطبيعية "جاسكو"، لما كشف عن زيادة كميات التصدير.

ياسر صلاح الدين، وضح أن الكميات المنقولة من الغاز الطبيعي عبر الشبكة القومية للغازات الطبيعية، عدت 72 مليار متر مكعب خلال عام 2022، ده غير أن كميات التصدير زادت بنسبة 33% عن عام 2021.

ورئيس شركة جاسكو، اتكلم كمان عن  التطور اللي تم في البنية التحتية للشبكة القومية للغازات الطبيعية، بعد ما وصل إجمالي أطوال الخطوط الرئيسية للشبكة 8264 كم.

طاقة النقل للخطوة دي، بتوصل لـ 262 مليون قدم مكعب يومياً من الغاز الطبيعي نتيجة تنفيذ مشروعات توسع وتدعيم الشبكة القومية.

كمان المركز المتميز لفحص وإصلاح الخطوط التابع لشركة جاسكو، فحص السنة اللي فاتت حوالي 269 كم من خطوط الشبكة القومية للغازات الطبيعية.

وفحص مجموعة تانية من خطوط الغاز والخام و المنتجات المملوكة للشركات الشقيقة بأطوال تصل إلى 788 كم.

الكلام ده كان خلال انعقاد الجمعية العامة لاعتماد نتائج أعمال الشركة المصرية للغازات الطبيعية "جاسكو" عن عام 2022.