اللمبة الحمراء نورت.. يبقى رصيد الكارت خلص

لو محتاج تعرف أمتي الرصيد بيخلص من العداد الكودي، تابعونا في إللي جاي علشان النور ميفصلش فى شقتك.

طبعا بتشحن الرصيد في الكارت الذكي وبتشحن العداد، وأول ما الرصيد يوصل لقيمة الـ 10جنيه ، العداد بينبهك بقرب انتهاء الرصيد عن طريق إضاءة لمبة البيان الحمراء، وإصدار صوت خافت.

لو الرصيد خلص والوقت كان الصبح بدري أو بالليل متأخر ومفيش مكان تشحن فيه الكارت.

العداد بيسمحلك بإستعادة الكهرباء مؤقتًا لحين الشحن، عن طريق وضع الكارت في العداد وهيشتغل من غير ما تشحن لمدة 48 ساعة فقط.

أما بقي لو في أي عطل حصل في العداد بعيد عن انتهاء الرصيد، والكهرباء فصلت.

في الحالة دي هنبلغ شركة التوزيع التابع لها المشترك، من غير ما نعمل أي محاولات لإصلاح العطل.

ولازم نكون عارفين أن أى محاولات لاكتشاف العطل، وحصل اهتزاز في العداد، ممكن يحصل تضارب في الكابلات الداخلية.

ولو حصل كده، لمبة التلاعب الموجودة بالعداد هتنور، وهتعمل مشكلة، ممكن توصل لدفع غرامات مالية وتحرير محضر سرقة تيار.