31 ألف كيلو متر جاهزين لإنتاج الكهرباء من الشمس والرياح

مصر بتعمل مشاريع استثمارية عملاقة ترفع من مكانتها ومتخليهاش في حالة عوز للدول المتقدمة عنها.

التقدم فى بلدنا بيحصل في كل المجالات وعلى رأسها الطاقة المتجددة.

من فترة الرئيس السيسى، أصدر قرار بتخصيص مساحات أراضى إضافية لمشروعات الطاقة المتجددة بمحافظات أسوان وسوهاج ومرسى مطروح.

الزيادة دي هترفع إجمالى المساحات المخصصة لـ 31 الف كيلو متر مربع.

وهتسمح باستيعاب قدرات إضافية لانتاج الكهرباء من طاقة الرياح والشمس أو لإنتاج الهيدروجين الأخضر.

الدكتور محمد شاكر وزير الكهرباء، ناقش خلال الاجتماع اللى عمله بمقر الوزارة بالعاصمة الإدارية القرار واستعرض مشروع موازنة هيئة الطاقة الجديدة والمتجددة للعام المالي 2022/2023.

الموازنة قدرت جملتها بـ 8.351 مليار جنيه موزعة علي 3.0 مليار جنيه موازنة جارية.

بالإضافة لـ 5.4 مليار جنيه موازنة استثمارية تتركز  علي إنشاء مشروعات طاقة متجددة.

المشروعات دي تتضمن استكمال أعمال انشاء محطة توليد الكهرباء باستخدام طاقة الرياح بقدرة 250 ميجاوات بمنطقة خليج السويس بالتعاون مع الشركاء الأوروبيين.

كمان هيتم استكمال محطة توليد الكهرباء باستخدام الخلايا الشمسية بقدرة 20 ميجاوات بمدينة الغردقة بالتعاون مع الوكالة اليابانية للتعاون الدولى.

كل ده بيحصل فى إطار سعى مصر لزيادة مشاركة مصادر الطاقة المتجددة لأكثر من 40% عام 2035.

وخلونا ممنساش أن العاملين بوزارة الكهرباء عاملين شغل عالي علشان ينتهوا من أعمال الصيانة وخطط الإصلاح لرفع المعدلات الإنتاجية، للمحطات الكهربائية.