دا خير مصر دا.. والسعودية عايزة تستثمر 1.5 مليار دولار في الطاقة المتجددة والهيدروجين الأخضر

طول عمرك يا مصر أرض الخير والثروات.. وده اللي خلى السعودية زي دول كتير تانية تيجي تستثمر في مصر، في مشروعات إنتاج الكهرباء من محطات الطاقة المتجددة وإنتاج الهيدروجين والأمونيا الخضراء.

وزارة الكهرباء تلقت 3 طلبات من شركات سعودية للاستثمار فى مشروعات الطاقة المتجددة باستثمارات بتوصل إلى 1.5 مليار دولار.

تقارير نقلت عن مصادر في وزارة الكهرباء، أن فيه مباحثات تمت بين الشركات السعودية مع مسئولين في الوزارة فى مصر، أخر السنة اللي فاتت، كان كل هدفها التفاوض بشأن المشروعات والبدء فى الإجراءات التعاقدية قبل نهاية السنة الحالية ٢٠٢٣.

في شركة منهم تقدمت بمقترح لإنشاء محطة طاقة رياح بقدرة 500 ميجاوات، وخدت موافقة مبدئية من أحد الصناديق الاستثمارية وبنك أوروبي لتمويل المشروع.

الشركة عايزة تخلص التفاوض مع وزارة الكهرباء وفقاً للشروط والضوابط المحددة لتنفيذ المحطات زي المشروعات اللي تم تنفيذها في الفترة الأخيرة.

شركتين سعوديتين قدموا مقترحين لتنفيذ مشروع لإنتاج الهيدروجين والأمونيا الخضراء، ومعاهم اتفاق مع مؤسسات دولية شغالة في نفس المجال ونفذت مشروعات فى عدد من الدول.

المقترح هو رؤية استثمارية طويلة المدى فى مصر وتكون باكورة مشروعاتها إنشاء مشروعين لإنتاج الطاقة المتجددة والهيدروجين.

وزارة الكهرباء هتشكل لجنةتدرس الطلبات المقدمة من الشركات السعودية للاستثمار ومراجعتها بما يتوافق مع استراتيجية الحكومة لتنفيذ المشروعات.

وأول ما ينتهوا من الدراسة هيتم رفع تقرير لوزير الكهرباء بشأن جدوى المشروعات لعرضه على مجلس الوزراء عشان ياخد قراره ويستكمل التفاوض.

من أهداف وزارة الكهرباء، ترفع مساهمة إنتاج الطاقة المتجددة من إجمالى القدرات المنتجة على الشبكة الكهربائية لأكثر من 40% بحلول عام 2035.

استراتيجية وزارة المهربا بتعتمد بالكامل على القطاع الخاص فى تنفيذ المشروعات.