عفشتك مش متظبطة؟ تعالى نقولك إزاي تعالجها

للناس اللي معاها عربية أوتوماتيك، لو حسيت بصوت تكة فى العفشة وأنت بتجيب الـ R أوD.

راجع قواعد الموتور والفتيس وشداد الفتيس وجلب القنطرة والبطاحات، ممكن تكون مكسورة أو فيها شرخ وكمان راجع علي جلب المقصات

ولو سمعت صوت صاج بياكل فى صاج راجع علي كاوتشة الميزان والتيل والطنابير

لو كسرت الكاوتشات وسمعت صوت تكة متكررة راجع على الكبالن الخارجية.

لو فيه رجة فى العربيه بتظهر من 60 كيلو لـ 120 كيلو وبتختفى بعد كدة راجع على الكبالن الداخلية.

لو فيه رجة على السرعات عالية راجع على الكاوتشات والجنوط ورصص

لو فيه دربكة فى الدريكسيون فى السرعات الخفيفة والأماكن المكسرة، راجع على علبة الدريكسيون والبارات الداخلية والخارجية

لو فيه دربكة في العربية من تحت فى السرعات الخفيفة والأماكن المكسرة.
راجع على جلب المقصات الأمامية والخلفية وكاوتشة الميزان

وأنت بتكسر العجل سمعت صوت تزييق راجع على البطاحات وبلية البطاحات.

وأنت بتدوس فرامل حسيت بدربكة تحت رجلك راجع على التيل والطنابير

- لو سمعت صوت صفارة فى العجل راجع على التيل والطنابير

لو سمعت صوت ونة فى العجل راجع على بلية العجل والسرة والكاوتشات والجنوط وظبط زوايا ورصص.

وأنت بتدوس فرامل والعربية لقتها مبتكلبش راجع على التيل والطنابير ودورة زيت الفرامل والكاوتشات.